لەکەرکوکەوە بۆســـــایـــتی هەتاو-ئــــــــــ کــــــــــ م ــــــــــا وەزیری.
لەبەر وێنەی ئاڵای کوردستان و چەند کەسایەتییەکی کورد گەنجێک حەوت ڕۆژ لەتورکیا دەست بەسەرکرا.
ئێوەت فەلاح ناسراو بەئێوەت کاکەیی گەنجێکی کوردی شاری کەرکوکە و ڕۆژی حەوتی ئەم مانگە لەڕێگای فڕۆکەخانەی هەولێرەوە بۆمەبەستی گەشت کردن سەردانی تورکیای کرد بەڵام لەفڕۆکەخانە نوێیەکەی ئەستەنبوڵ لەتورکیا دەست بەسەرکرا.
 |
| کۆتا وێنەی ئێوەتە لەنێو فڕۆکەخانەی هەولێر لەفەیسبوکی ئێوەتەوە وەرگیراوە/ ۷ـی ئەیلولی۲۰۱۹ |
سەرەتا بنەماڵەکەی هۆکارەکەیان بۆئەوە گەڕاندەوە، کەئێوەت جگەلە زمانی کوردی هیچ زمانێکی تر نازانێت بۆیە دەست بەسەرکراوە، بەڵام هەتاو شەوی هەینی ۱۳ـی ئەیلولی۲۰۱۹ لەڕێی مەسەنجەرەوە بەشێوەیەکی نهێنی پەیوەندی بەئێوەتەوە کرد و ڕاستییەکانی لەزاری ئێوەتەوە زانی.
ئێوەت لەولێدوانەی دا بەهەتاوی ڕاگەیاند، پاش گەیشتنی بەفڕۆکەخانەی ئیستەنبوڵ لەنێو فڕۆکەخانەکە لەلایەن تیمی ئاسایشی فڕۆکەخانەوە پشکنین بۆمۆبایلەکەی کراوە و بەهۆی بینینی وێنەیەکی ئاڵای کوردستان و مەسعود بارزانی سەرۆکی پێشووی هەرێمی کوردستان و عەبدوڵا ئۆجەلان ڕابەری زیندانی کراوی پارتی کرێکارانی کوردستان ناسراو بە(پەکەکە) دەست بەسەرکراوە
ئێوەت گوتیشی، لەلایەن تیمی ئاسایشی فڕۆکەخانەکەوە پێی ڕاگەیاندراوە، کەبەهیچ جۆرێک ناتوانێت بچێتە نێو خاکی تورکیاوە و گومانی ئەوەشی لێکراوە پەیوەندی بەپەکەکەوە هەبێت و لەلایەن ئەو وڵاتەشەوە پاسپۆڕتەکەی لەکارخرا و تاپێنج ساڵی تر ناتوانێت سەردانی ئەو وڵاتە بکات.
ئێوەت داوای لەگەنجانی کوردی هەرێمی کوردستان کرد، کەئاگاداری خۆیان بن و ڕایشیگەیاند، هەرفڕۆکەیەک لەهەرێمی کوردستانەوە بەرەو تورکیا بفڕێت و پاش ئەوەی دەگاتە ئەو وڵاتە لەلایەن تیمی ئاسایشی ئەو وڵاتەوە پشکنین بۆمۆبایلی سەرنشینانی فڕۆکەکە ئەنجام دەدەن بەتایبەتی گەنجەکان و هەر مۆبایلێکیش گومانی لێبکرێت ئەوا دەست بەجێ دەس بەسەردەکرێت و پاشان دیپۆرت دەکرێتەوە.
 |
| کۆتا وێنەی ئێوەت لەفڕۆکەخانەی ئەستەنبوڵ چەند خولەکێک پێش دیپۆڕت کردنەوەی/ ۱٤ـی ئەیلولی۲۰۱۹ |
پاش حەوت ڕۆژ لەدەست بەسەرکردنی کاتژمێر ٤:۰۰ـی ئێوارەی شەمە ۱٤ـی ئەیلولی ۲۰۱۹ لەلایەن تیمی ئاسایشی فڕۆکەخانەی ئەستەنبوڵەوە ئێوەت ئازاد کرا و بەفڕۆکە ڕەوانەی فڕۆکەخانەی هەولێرکرایەوە و کاتژمێر ۷:۰۰ـی شەوی هەمان ڕۆژ گەیشتەوە بەفڕۆکەخانەی هەولێر و بەخانەوادەکەی شاد بووەوە.
 |
| ئێوەت و باوکی لەفڕۆکەخانەی هەولێر پاش گەیشتنەوەی ئێوەت بەفڕۆکەخانەی هەولێر لەئێوارەی ۱٤ـی ئەیلولی ۲۰۱۹ |
