ڕاپەڕین بۆچی کرا و کێ بەرهەمەکەی خوارد
خەڵکی کوردستان دەیان ساڵ بوو بەدەست ڕژێمی بەعسەوە ئەیناڵاند و ستەمی لێئەکرا ، رژێمی بەعس و سەدام یەکێك بوون لە فاشیسترین رژێمە توتالیتار و دیکتاتۆرەکان لە رۆژهەڵاتی ناویندا کە گەلانی عێراقیان ئەچەوساندەوە و سەرکوتیان ئەکرد ..
گەلی کورد زۆرترین زیانی بەرکەوت لەسایەی حوکمی بەعسیەکاندا بە کوشتن و زیندانیکردن و تەعریب و ئەنفال و کیمیاباران و خاپوورکردنی شار و گوندەکان و کۆمەڵکوژیەکاندا ..
ڕاپەرینی خەڵکی کوردستان لە ساڵی ۹۱ دا بەرەنجامی ئەو شەپۆلە تورەیی و ستەمە زۆرە بوو کە ساڵانێک بوو پەنگی خواردبووەوە لە دەرفەتێکدا خەڵکی کوردستان ڕاپەڕین و شار و گوندەکانی کورستانیان ئازاد کرد و رژێمی فاشیستی بەعسیان ڕاماڵی ..
ئەو گەشبینی و ئامانجانەی کە خەڵکی کوردستان لە سەرەتای ڕاپەڕیندا هەیبوو ، ئازادبوون بوو لە رژێمی سەرکوت و تۆقاندن و لێدان و فەلاقە کردن و زیندانی کردن ، هەروەها بەدەست هێنانی دیموکراسی و کۆتایی پێهاتنی سیستەمی تاکڕەوی حیزبی و ملهوڕی بنەماڵەیی ..
خەڵکی کوردستان ویستیان ژیانێکی شایستە بە مرۆڤ دوور لە ستەم و چەوسانەوەیان هەبێت و ماف و کەرامەتیان پارێزراو بێت ..
جەماوەری کوردستان لەپێناو ئەو ئامانجانەدا هەزاران قوربانیان بەخشی و ماڵیان وێران بوو و چەندین جار ئاوارە بوون و بێ دەرەتان بوون ، ئەو هەموو ڕەنج و تێکۆشان و قوربانیدانە بۆ ئەوە بوو ژیانێکی باشترمان هەبێت ..
مەخابن لەدوای ڕاپەرین و زاڵبوونی هەژموونی حیزبەکانی بەرەی کوردستانی لە دوای دەرکردنی رژێمی سەدام ئەو ئاوات و خولیایانەی خەڵکی نەهاتەدی و بگرە حوکمڕانی کوردی لە ئاوێتەی حیزبەکانی ئیسلامی و کوردایەتی ، جارێکی تر خەونەکانی ڕاپەڕینیان لە گۆڕنا و خەڵکیان دڵشکاو کرد ..
کارنامەی دەسەڵات و قەوارەی کوردی لە باشووری کوردستان لە کوشت و بڕی ژنانەوە دەستی پێکرد تا سەرکوتی سیاسی هێز و لایەنە بەرهەڵستکارەکانی بەرە و دەسەڵاتی حیزبە کوردیەکان ..
لە ماوەی ۳٠ ساڵ حوکمڕانیاندا هەرچی لەدەستیان هات کردیان لە سات و سەودا لەگەڵ ووڵاتەکانی ئێران و تورکیا و رژێمی بەعس و ووڵاتانی ناوچەکە ..
بوون بە هۆکاری نا جێگیری سیاسی و ئاسایشی کوردستان و دروست کردنی قەیرانەکان و هەڵگیرساندنی شەری ناوخۆی و بە کوشتدانی هەزاران کەس لە پێناو ململانێ و پاوانخوازی حیزبیدا ..
خەڵکیان تیرۆرکرد ، جیاوازی چینایەتیان قوڵتر کردەوە ، گەندەڵی بوو بە سیمای دیاری حیزبەکانی کوردستان ، دەیان هەزار گەنجیان خستە دۆخێکی خراپ کە بڕیاری کۆچکردن بدەن بە سنوورە مەترسیدارە ئاویەکانی نێودەوڵەتیدا و سەدان کەس خنکان و ژیانیان لەدەست دا ..
موچەی خەڵکیان بڕی و هەرچی زەوی و موڵکی کوردستان و شاخ و گردۆلکە هەیە داگیریان کرد و کردیان بە موڵکی خۆیان ، بەرپرسە حیزبی و پلەدارەکان بوون بە خاوەن کۆشك و ڤیلا و بزنس و ژیانی شاهانە و باخ و دەفتەرە دۆلار لەولاشەوە خەڵکی هەژاریان ناچارکرد لە پێناو بژێویدا ببێتە چەکداری حیزبەکان ..
ئازادی و ڕادەربرین و خۆپیشاندان و مافی خەڵکی و مافی مرۆڤ لە دۆخێکدا خراپتر لە سەردەمی بەعس ، دەیان چالاکوانی سیاسی تیرۆرکرا و ڕاپێچی زیندانەکان کران و حوکم دارن لەژێر حوکمی قەرەقوشی ملهوڕی حیزبەکاندا ..
خەلکی کوردستان ڕاپەڕینی بۆ ئەوە ئەنجام دا ژیانێکی شایستەی مرۆڤانەی هەبێ بەڵام مەخابن پاش ۳٠ ساڵ لە ڕاپەڕین و ئازادبوونی کوردستاندا خەڵکی کوردستان لەلایەن دەسەڵاتی کوردیەوە بە هەموو شێوەیەك ئەچەوسێنرێنەوە و مافیان لێزەوت ئەکرێت و سەرکوت ئەکرێن ، کەواتە لەدوای ڕاپەڕینەوە خەڵکی هیچ دەستکەوتێکی نەبووە بگرە خراپتربووە ..
ئارام حمەسعید
٦ ی ئازار ۲٠۲۱