بەهۆی ڕێکنەکەوتن لەسەر میکانیزمی دانان و دیاری کردنی کاندیدەکان و لەدوای حەوت کۆبوونەوە و زیاتر لەپێنج مانگ هەوڵدان دواجار حزبەکوردییەکانی کەرکوک نەگەیشتنە ڕێککەوتن و لیستەکە هەڵوەشایەوە.
ڕۆژنامەنووس ئاکام وەزیری لەپێگەی خۆی لەتۆڕی کۆمەڵایەتی فەیسبوک هەواڵی هەڵوەشاندنەوەی لیستە کوردییەکەی کەرکوکی بڵاو کردەوە و ڕایگەیاند، بەشێک لەبەرپرسانی سیاسی حزبە کوردییەکان دەڵێن: "هۆکاری هەڵوەشاندنەوەکەی بۆئەوە دەگەڕێتەوە، کە یەکێتی ویستوویەتی تەنها خۆی لەکەرکوک کاندیدی هەبێت و ئەوانیش ڕەتیانکردووەتەوە بەتەنها یەکێتی کاندیدی هەبێت".
وتیشی: "بەپێی زانیارییەکانم لەکۆبوونەوەکەی ٩ـی شوبات، کەبارەگای مەڵبەندی کەرکوکی کۆمەڵی دادگەری کوردستان بڕێوەچوو، حزبەکان پێشنیاری ئەوەیان خستبووەڕوو، کە لەبازنەی یەکەمدا تەنها پارتی و یەکێتی کاندیدیان هەبێت و لەبازنەی دووەم دا ئەو دووحزبە کاندیدیان نەبێت و کار بۆکاندیدانی حزبەکانی تر بکەن، بەڵام یەکێتی و پارتی ئەو پێشنیارەیان ڕەتکردووەتەوە".
ئاماژەی بەوەشداوە، کەبەپێی زانیارییەکان ئێستا یەکێتی و پارتی لیستی خۆیان پێشکەشی کۆمیسیۆنی باڵای سەربەخۆی هەڵبژاردنەکان کردووە و تەنها حزبەکانی تر ماونەتەوە لیست پێشکەش بکەن.
لەماوەی چەند مانگی ڕابردوودا حزبەکان حەوت کۆبوونەوەیان بۆپێکهێنانی لیستێکی هاوبەشی کوردی لەهەڵبژاردنەکانی مانگی ئۆکتۆبەری ئەمساڵ پێکهێنا، بەڵام دوای حەوت کۆبوونەوە شکستیان هێنا لەدرووستکردنی لیستەکە.
